Saboh riwayat narit lon peutroh
di Nanggroe jioh keu saboh bangsa
jiduek lam uruek ji eh dalam broh
Keu Bangsa tikoh haba lon rika
Tikoh di Blang atawa di lampoh
Wajeb taparoh bek tanyo binasa
Glong jeuneurob tapageu lampoh
Taleet beu jioh bek lee ji teuka
Dilee kon udep di bangsa tikoh
Kayem jipiyoh lam uruek raya
Meuaneuk binoe sinan dalam broh
Hinan seumajoh pue-pue nyang hawa
Tapula ubi golom troh tanggoh
Kalheuh dijak kueh peureudei jiba
Pade tatabu keu bu ta pajoh
Troh bangsa tikoh ka jijak seuba
Leupah sengsara menyoe na tikoh
Habeh ji sampoh jagong keupila
Harkat ta udep sabe hana troh
Tabiat tikoh lagei nyan rupa
Jino hai abu jipeugah katroh
Rame dum tikoh dalam istana
Jicok hareukat bak luwah lampoh
Ka jak peuroh bak peutron keunira
Hak Aneuk yatim jitem jak sampoh
Jitem jak pajoh hak inong janda
Pak Irwandi neu mat peujampoh
Bagah neu paroh tikoh bek lee na
Menyoe teulat neumat peujampoh
Geutanyoe kiroeh sama sibangsa
Saweub diadu tanyoe meu soh-soh
Nyan cara tikoh bak reubot kuasa
Kadang e teungku neujak u lampoh
Meureumpok tikoh neuturi hana
Neu eu peulandok neupeugah tikoh
Mungken syit lapoh sisat lam paya
Ulee ji tincu iku ji haloh
Bulei bak tuboh rapoh lagoina
Misei ji panyang bagah that duroh
Tanda nyan tikoh bek na le dawa
Gigoe ji blah keu tajam dua boh
Bagah bak jikoh makanan raya
Punyueng ji rayeuk ruhueng diteungoh
Mangat bagah troh info bahaya
Neujak u Calang bak Gureutei neupiyoh
Troh u Meulaboh uroe ka Asa
Bek bi jabatan keu bangsa tikoh
Habeh ji pajoh harta neugara
di Glee Maheng Ureung meulampoh
Ateuh Gunong Goh ureung meurusa
E Pak Irwandi beuteugoh-teugoh
Mantong le tikoh dalam istana
Pemimpin Aceh jinoe beu sunggoh
Jak paroh tikoh dalam istana
Suwa ta peuhu tatet ngon suloh
Cara let tikoh kon dengon TAKPA
Istana beugleh bek seumak ngon broh
Han jiduek le tikoh ka jilop peunjara
Sayang that rakyat ekonomi leumoh
Kadang syit rumoh pat jiduek hana
Angen sinja jipot u Meulaboh
Wate oh beungoh jipot u Banda
Mumada ohnoe hikayat tikoh
Hana meutanggoh lon sambong haba.

Share